>
काठमाडौं । नेपाली पप–फोक शैलीका लोकप्रिय गायक दुर्गेश थापा र सिसन बानियाँको नयाँ तीज विशेष गीत ‘जाने भए जाम माया’ युट्युबमा सार्वजनिक भएको केही घण्टामै कीर्तिमानी हिट बनेको छ।
बुधबार बेलुकी सार्वजनिक गरिएको गीतले २४ घण्टा नपुग्दै नेपाली युट्युब इतिहासमै सर्वाधिक भ्यूज प्राप्त गर्ने गीतको कीर्तिमान बनाएको हो। रिलिज भएको २० घण्टामै यस गीतलाई १६ लाख ३६ हजारभन्दा बढी पटक हेरिएको छ।
यो संख्या अघिल्लो रेकर्ड होल्डर विष्णु माझीको ‘आइन आम यो तीजमा’ गीतको भन्दा धेरै हो। माझीको गीतलाई पहिलो दिन १५ लाख पटक हेरिएको थियो, जुन अहिलेसम्मको सर्वाधिक भ्यूज भएको नेपाली गीत मानिन्थ्यो।
दुर्गेश थापाको नयाँ गीतले त्यो रेकर्ड सहजै तोड्दै ट्रेन्डिङ चार्टमा समेत स्थान बनाएको छ। गीतको बोल, भिजुअल प्रस्तुति र सिसन बानियाँको अभिनयका कारण यो गीत रिलिजअघि नै चर्चा बटुल्न सफल भएको थियो।
‘जाने भए जाम माया’ गीतले तीजको पूर्वसन्ध्यामा नेपाली संगीत बजारमा उत्साहजनक माहोल बनाएको छ। युट्युबमा दर्शकहरूको व्यापक आकर्षण देखिएको यो गीतले आगामी दिनमा अझ धेरै भ्यूज बटुल्ने संकेत देखिएको छ।
