>
गुल्मी — धार्मिक तथा ऐतिहासिक स्थल रेसुङ्गामा साउने मेला सुरु भएको छ। गुल्मी सदरमुकाम तम्घास नजिकै रहेको रेसुङ्गामा प्रत्येक वर्षझैं यसपालि पनि मन्दिर व्यवस्थापन समितिको आयोजनामा साउन महिनाभर मेला सञ्चालन हुने भएको हो।
महिनाभर दैनिक पूजा, प्रवचन र स्नानको कार्यक्रम हुने मेला संरक्षण समितिका महासचिव यज्ञप्रसाद पन्थीले जनाए। पहिलो दिनदेखि नै भक्तजनहरूको उल्लेख्य भीड लागेको छ। गुल्मीका साथै अर्घाखाँची, पाल्पा, प्यूठान, बागलुङ, रुपन्देही लगायत विभिन्न जिल्लाबाट श्रद्धालुहरूको आगमन भइरहेको छ।
धार्मिक विश्वास अनुसार, रेसुङ्गाको पोखरीमा स्नान गर्दा पापमोचन हुने जनविश्वास रहेको छ। विशेषगरी साउन १, एकादशी र औँसीका दिन विशेष मेला लाग्ने गर्छ।
रेसुङ्गा ऐतिहासिक तथा धार्मिक दृष्टिले महत्वपूर्ण स्थल हो। ऋषि श्रृङ्ग, यदुकानन्द, रामचन्द्र आदिका तपोभूमिका रूपमा समेत रेसुङ्गाको चर्चा वेद र पुराणहरूमा पाइन्छ। राजा दशरथले पुत्रेष्टि यज्ञ गराएका ऋष्यश्रृङ्ग यहीं तपस्यामा लीन थिए भन्ने विश्वास पनि छ।
रेसुङ्गामा बनाइएको भ्यू टावरबाट हिमश्रृंखला, हरियाली डाँडाकाँडा, र रमणीय दृश्य देख्न सकिन्छ। शान्त, हराभरा र जैविक विविधता समेटिएको यो ठाउँ पैदल यात्राका लागि आकर्षक गन्तव्य बनेको छ।
रेसुङ्गा नगरपालिका अहिले "जाउँ हिंड रेसुङ्गा" अभियानमार्फत आन्तरिक पर्यटन प्रवर्द्धन गरिरहेको छ। यस अभियानमार्फत एक लाख पर्यटक भित्र्याउने लक्ष्य राखिएको छ।
रेसुङ्गा अहिले धार्मिक आस्थाका साथै अध्ययन, शोध र प्राकृतिक पर्यटनको उत्कृष्ट थलोका रूपमा विस्तार हुँदै गएको छ।
