>
काठमाडौं । देशभर मनसुन सक्रिय भएसँगै पहिरो र बाढीले यातायात व्यवस्था अस्तव्यस्त बनेको छ । आइतबार मात्रै ८ वटा सडक खण्ड पूर्ण रूपमा बन्द भएका छन् भने ८९ स्थानमा सडक एकतर्फी मात्रै सञ्चालनमा छन् । लगातारको झरी, पहिरो, र खोला उर्लिएपछि सडक विभागले सडक मर्मतमा कठिनाइ भएको जनाएको छ।
अरनिको राजमार्ग अन्तर्गत सिन्धुपाल्चोकको जुरेमा ठूलो पहिरो खस्दा दोलालघाट–कोदारी खण्ड अवरुद्ध भएको छ । त्यसैगरी, मेची राजमार्गको ताप्लेजुङ–ओलाङचुङगोलातर्फ हेवा खोलाले बाटो कटान गर्दा सवारी आवागमन ठप्प छ । खोलाको बहाव कम भएपछि मात्रै डाइभर्सन मर्मत थालिने जनाइएको छ ।
धनकुटाको भेडेटार–राँके सडकमा, मुस्ताङको भेना गाउँ, र सङ्खुवासभाको देउरालीमा पनि पहिरोले सडक पूर्णरूपमा थुनिएको छ । यी स्थानहरूमा स्काभेटर र ब्याकहोइ प्रयोग गरी सडक खुलाउने प्रयास भइरहेको छ, तर निरन्तर वर्षाले काम प्रभावित बनाएको छ ।
शहिदमार्ग अन्तर्गत रोल्पाको अर्जुनखोला–घर्तिगाउँ खण्डमा पानीको बहावसँगै माटो र लेदो आएपछि बाटो अवरुद्ध भएको छ । पानी रोकिएपछि मात्र मर्मत सम्भव हुने विभागले जनाएको छ ।
कोशी राजमार्गको तुम्लिङ्टार–किमाथांका खण्डमा असार २९ गते वरुण नदीमा बनेको डाइभर्सन बगाएपछि अझैसम्म नयाँ डाइभर्सन बनाउने कार्य थाल्न नसकिएको जनाइएको छ । उही मार्गअन्तर्गत पुल ढलान पनि बाँकी छ, जुन पानी घटेपछि मात्र सम्भव हुने देखिन्छ ।
यस्तै, असार २४ गते आएको बाढीले स्याफ्रुवेसी–रसुवागढी सडक पनि पूर्ण रूपमा अवरुद्ध भएको छ । त्यसलाई खुलाउने प्रयास भइरहेको भए पनि लगातार वर्षाले अवरोध पुर्याइरहेको छ । विभागले अत्यधिक वर्षाका बेला यात्रामा ननिस्कन सर्वसाधारणलाई आग्रह गर्दै आवश्यक उपकरण तथा जनशक्ति परिचालन गरिरहेको जनाएको छ।
