>
काठमाडौं । बंगलादेशको गोपालगञ्जमा बुधबार भएको र्याली हिंसात्मक बन्दै गएपछि प्रहरीको गोली चल्दा ४ जनाको ज्यान गएको छ भने ९ जना घाइते भएका छन्।
नेसनल सिटिजन पार्टी (एनसीपी) आबद्ध युवाहरूको र्यालीका क्रममा शेख हसिनाको पार्टी अवामी लीगका समर्थकहरू र सुरक्षाकर्मीबीच झडप भएको थियो। प्रत्यक्षदर्शीका अनुसार प्रदर्शनकारीहरूले ढुंगा, लाठी र इँटा प्रहार गरेपछि प्रहरीले जवाफमा गोली, अश्रुग्यास र साउन्ड ग्रिनेड चलायो।
मृतकमध्ये तीन जनाको पहिचान खुलेको छ। गम्भीर घाइते अवस्थामा अस्पताल पुर्याइए पनि उनीहरूको ज्यान जोगाउन सकिएन।
हिंसाको बाबजुद पनि एनसीपीले आफ्नो र्याली जारी राख्यो। पार्टी संयोजक नाहिद इस्लामले न्यायको माग गर्दै ‘यदि सुरक्षा निकाय मौन बस्यो भने हामी आफैंले न्याय लिन्छौं’ भने।
प्रधानमन्त्री कार्यालयले गोपालगञ्जमा कर्फ्यु लगाउँदै अर्धसैनिक बल परिचालन गरेको छ।
एनसीपी हालै गठन भएको विद्यार्थी नेतृत्वको नयाँ राजनीतिक शक्ति हो जसलाई अन्तरिम सरकार प्रमुख मुहम्मद युनुसको समर्थन प्राप्त छ। युनुसले घटनालाई मौलिक अधिकारमाथिको हमला भन्दै दोष अवामी लीग र यसको निकायमाथि लगाएका छन्।
