रुससँगको लम्बिएको युद्धको बीचमा युक्रेनी राष्ट्रपति भोलोडिमिर जेलेन्स्कीले शान्ति वार्ता पुनः सुरु गर्न प्रस्ताव गरेका छन्। केही महिनादेखि औपचारिक वार्ता स्थगित भएको अवस्थामा यस्तो संकेत आएको हो।
राष्ट्रपति जेलेन्स्कीका अनुसार युक्रेनी वरिष्ठ सुरक्षा अधिकारी रुस्तम उमरोभले अर्को साता रुसी प्रतिनिधिहरूसँग प्रत्यक्ष भेटवार्ताको प्रस्ताव गरेका छन्। उनले युद्ध रोक्नका लागि सबै विकल्प खुला राख्दै नेतृत्व तहमै संवाद आवश्यक भएको दोहोर्याए। “शान्ति सुनिश्चित गर्न नेतृत्वस्तरीय बैठक अपरिहार्य छ,” जेलेन्स्कीले भने।
उनले फेरि एकपटक रुसी राष्ट्रपति भ्लादिमिर पुटिनसँग आमनेसामने बस्नुपर्ने आवश्यकता औँल्याए। जेलेन्स्कीको भनाइले युद्धविरामका लागि कूटनीतिक प्रयासहरू अझ सशक्त हुने संकेत दिएको छ।
यसैबीच, पूर्व अमेरिकी राष्ट्रपति डोनाल्ड ट्रम्पले युक्रेनलाई सैन्य सहायता दिने योजनाको घोषणा गरेका छन्। उनले चेतावनी दिँदै भनेका छन्, “यदि आगामी ५० दिनभित्र युद्धविराम भएन भने रुसमाथि कठोर आर्थिक ट्यारिफ लगाइनेछ।”
सन् २०२२ मा सुरु भएको रुस-युक्रेन युद्ध अझै अन्त्य भएको छैन। हजारौँ नागरिकको ज्यान गइसकेको छ भने लाखौँ विस्थापित भएका छन्। यस्तो अवस्थामा शान्ति वार्ताको प्रयास पुनः सुरु हुनु महत्वपूर्ण मोडको रूपमा हेरिएको छ।
>
