वर्षौँसम्म टेलिभिजन टीआरपीमा राज गरेको कपिल शर्माको चर्चित कमेडी कार्यक्रम ‘द कपिल शर्मा शो’ ओटीटीमा ‘द ग्रेट इन्डियन कपिल शो’ का रूपमा आएको केही समयमै दर्शक घट्न थालेका छन् । नेटफ्लिक्समा प्रसारित यो शोको तेस्रो सिजनले दर्शक तान्न कठिनाइ भोगिरहेको छ ।
सिजन ३ का पाँच एपिसोडहरू सार्वजनिक भइसकेका छन् । तर शोको प्रारम्भिक सफलता पछिल्लो एपिसोडहरूमा कायम रहन सकेको छैन । पहिलो तीन एपिसोड नेटफ्लिक्सको विश्वव्यापी गैर–अंग्रेजी टप १० मा परे पनि पछिल्ला दुई एपिसोड सूचीबाट हटिसकेका छन् ।
सुरुमा चमक, पछि मन्दी
सिजनको पहिलो एपिसोडमा सलमान खान अतिथि थिए, जसले १६ लाख भ्यूज पायो र १९ लाख घण्टा हेरिएको थियो । दोस्रो एपिसोडमा ‘मेट्रो इन दिनों’ का कलाकार आएका थिए, जसले पहिलो दुई हप्तामा संयुक्त २० लाख भ्यूज पाएको बताइएको छ ।
तर तेस्रो हप्तामा क्रिकेटर गौतम गम्भीर, युजवेन्द्र चहल र ऋषभ पन्त आएपछि दर्शक सङ्ख्या १२ लाखमा झर्यो । चौथो र पाँचौँ एपिसोड त झन् नेटफ्लिक्सको ग्लोबल चार्टबाटै हराए ।
दर्शक तान्न नयाँ रणनीति
दर्शक घटिरहे पनि शो अझै पनि नेटफ्लिक्स भारतको शीर्ष लोकप्रिय कार्यक्रममध्ये एक हो । तर विश्वव्यापी दर्शकसंख्या घटेपछि अब नेटफ्लिक्स र मेकरहरू नयाँ रणनीति अपनाउने तयारीमा छन् ।
आउँदो एपिसोडमा कन्टेन्ट क्रिएटरहरू – राज शमानी, सौरभ द्विवेदी, कामिया जानी र समदिश भाटियालाई ल्याएर शोमा विविधता र नयाँपन दिन खोजिएको छ ।
ओटीटीको प्रतिस्पर्धी बजारमा दर्शकको ध्यान खिच्नका लागि पुराना गिमिक भन्दा बाहिर निस्कन कपिल शर्मा र उनकी टिम तयार देखिन्छन् । अबको भाग्य दर्शकको प्रतिक्रिया र कन्टेन्टको नवीनतामै भर पर्नेछ ।
>
