जाकार्ता — इन्डोनेसियाले गाजाबाट करिब २ हजार घाइतेको उपचार गर्ने घोषणा गरेको छ। राष्ट्रपति कार्यालयका प्रवक्ताले शुक्रबार दिएको जानकारी अनुसार, ती घाइतेलाई कसरी इन्डोनेसिया ल्याइने भन्ने विवरण भने अझै सार्वजनिक गरिएको छैन।

सिंगापुरको दक्षिणमा अवस्थित गलाङ टापुमा रक्षा र परराष्ट्र मन्त्रालयको समन्वयमा विशेष स्वास्थ्य केन्द्र स्थापना गरिने इन्डोनेसियाले जनाएको छ। यस टापुमा संयुक्त राष्ट्रसंघले विगतमा भियतनामी शरणार्थीलाई आश्रय दिएको थियो, र कोभिड–१९ महामारीको समयमा अस्थायी अस्पताल पनि सञ्चालन भएको थियो।

प्रवक्ताका अनुसार यो ‘उद्धार अभियान’ नभई केवल उपचारको उद्देश्यका लागि हो। घाइतेहरू पूर्ण निको भएपछि गाजा फर्किने व्यवस्था मिलाइनेछ।

गाजा–इजरायल द्वन्द्वबारे छलफलमा इन्डोनेसियाको यो पहिलो संलग्नता होइन। गत अप्रिलमा राष्ट्रपति प्राबोवो सुबिअन्तोले करिब एक हजार गाजावासीलाई आश्रय दिन तयारी रहेको बताएका थिए।