अविरल वर्षा र भारी हिमपातका कारण उपल्लो मुस्ताङ क्षेत्र सडक, बिजुली र इन्टरनेट सेवाबाट पूर्ण रूपमा विच्छेद भएको छ। जोमसोम–कोरला राष्ट्रिय गौरवको सडकखण्ड ठाउँ–ठाउँमा भासिएर र पहिरो खस्दा आवागमन ठप्प बनेको छ। यसले गर्दा साढे पाँच सयभन्दा बढी पर्यटक र १०८ सवारी साधन त्यहीँ फसेका छन्।

बागबेनी कटेर छुसाङदेखि माथि सडक, बिजुली र इन्टरनेट अवरुद्ध भएका छन्। लोमान्थाङलगायत बस्तीहरूसँग ११ गतेदेखि नै सम्पर्क विच्छेद भएको छ। प्रहरी प्रमुख डिएसपी छिरिङ किप्पा लामाका अनुसार छुसाङदेखि माथि आधा दर्जनभन्दा बढी ठूला पहिरो खसेका छन् र जेसिबी प्रयोग गरेर सडक खुलाउने प्रयास भइरहेको छ।

प्रमुख जिल्ला अधिकारी विष्णुप्रसाद भुसालका अनुसार उपल्लो मुस्ताङमा रहेका सबैसँग सम्पर्क विच्छेद भएको छ र ठूलो पहिरो पन्छाउन कम्तीमा तीन दिन लाग्ने अनुमान गरिएको छ।

हिमपातका कारण किसान उत्साहित भए पनि प्राकृतिक जोखिम बढेको छ। प्रशासनले यात्रु र स्थानीयलाई सचेत रहन आग्रह गरेको छ। अहिले जोमसोम–कागबेनी सडक सञ्चालनमा आइसकेको छ, तर छुसाङदेखि माथिको क्षेत्र अझै सम्पर्कविहीन छ।