अमेरिका र चीनबीच चर्किँदो व्यापार युद्धबीच दुई देशका शीर्ष नेता दक्षिण कोरियामा भेट्न लागेका छन्। अमेरिकी राष्ट्रपति कार्यालय ह्वाइट हाउसका अनुसार आज स्थानीय समय बिहान ११ बजे राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच भेटवार्ता हुनेछ।

चिनियाँ विदेश मन्त्रालयले पनि बुसान शहरमा हुने उक्त भेटको समय पुष्टि गर्दै दुवै नेताबीच द्विपक्षीय सम्बन्ध, आपसी हित र व्यापार सन्तुलनका विषयमा छलफल हुने जनाएको छ। यसअघि मलेसियामा दुई देशका उच्च अधिकारीबीचको वार्ताले व्यापार सम्झौताका लागि प्रारम्भिक ढाँचा तयार पारेको बताइएको छ।

दुवै नेता दक्षिण कोरियाको ग्यांग्झूमा हुने एशिया प्यासिफिक इकोनोमिक कोअपरेशन (एपेक) शिखर सम्मेलनमा पनि सहभागी हुनेछन्। सोही सम्मेलनअघि हुने यो भेटमा अमेरिकी कृषि उत्पादन—विशेषगरी सोयाबिन खरिदका विषयमा छलफल हुनेछ।

समाचार संस्था रोयटर्सका अनुसार चीनको सरकारी कम्पनी कोफ्कोले अमेरिकाबाट तीन खेप सोयाबिन खरिद गरिसकेको छ, जसलाई यस वर्षको पहिलो ठूला खरिदको रूपमा हेरिएको छ। लामो समयदेखि जारी व्यापारिक शुल्क विवादका कारण अमेरिकी किसानहरू अरबौं डलर बराबरको घाटा व्यहोर्दै आएका छन्।

यो भेटवार्ताबाट अमेरिका–चीन व्यापार युद्ध अन्त्यतर्फ उन्मुख हुने अपेक्षा गरिएको छ।