३१ भदौ, म्याग्दी । तीन दिनदेखि अवरुद्ध बेनी–जोमसोम–कोरला सडक आज बिहानदेखि पुनः सञ्चालनमा आएको छ। म्याग्दीको अन्नपूर्ण र मुस्ताङको थासाङ गाउँपालिकाको सिमानामा पर्ने काभ्रेभिरमा आइतबार बिहान पहिरो खसेपछि ७६ किलोमिटर लामो यो सडक पूर्ण रूपमा बन्द भएको थियो। नेपाली सेनाको सहयोगमा विस्फोटक पदार्थ प्रयोग गरी ठूला ढुङ्गा फुटाइएका र त्यसपछि डोजरमार्फत माटो–ढिस्को पन्छाएर गए राति करिब १० बजे सडक खुलाइएको घाँसा प्रहरी चौकीका प्रमुख प्रहरी सहायक निरीक्षक मीनबहादुर खत्रीले जानकारी दिए। उनका अनुसार सडक आयोजना कार्यालयका प्राविधिक, नेपाली सेना र सुरक्षाकर्मीले रातिसम्म खटेर काम गरेपछि सडक सञ्चालनमा आएसँगै मुस्ताङको घाँसा र म्याग्दीको काभ्रेमा रोकिएका सवारीसाधन गन्तव्यतर्फ लागेका छन्।

सडक अवरुद्ध हुँदा चीनको कोरलानाकाबाट सामान ल्याएका कन्टेनर र मुस्ताङका स्याउ तथा आलु बोकेका मालबाहक ट्रकहरू समेत थुनिएका थिए। सोह्रश्राद्धका अवसरमा मुस्ताङको कागबेनीमा पितृतर्पणका लागि देशका विभिन्न भाग र भारतबाट आएका तीर्थयात्री, स्थानीयवासी र पर्यटक पनि बाटो खुल्न पर्खिरहेका थिए।

सिन्धुपाल्चोकको तातोपानी र रसुवाको नाका बन्द भएपछि दसैंको तयारीका लागि आवश्यक दैनिक उपभोग्य सामग्री कोरलानाकामार्ग हुँदै नेपाल भित्र्याइँदै आएको छ। यस कारण बेनी–जोमसोम सडक खण्डमा सवारीसाधनको चाप अत्यधिक बढेको स्थानीय प्रशासनले जनाएको छ।