काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले पदाधिकारी बैठक बोलाएका छन्। उपमहासचिव हरिबोल गजुरेलका अनुसार बैठक आइतबार दिउँसो २ बजे केन्द्रीय कार्यालय पेरिसडाँडामा बस्नेछ।
बैठकमा पछिल्लो स्थानीय समितिको निर्णय कार्यान्वयन, पार्टी एकतामा जोडिएका नेताहरूको जिम्मेवारी, स्थगित भएको मध्यपहाडी लोकमार्ग केन्द्रित अभियान सञ्चालन, र समसामयिक राजनीतिक विषयमा छलफल हुने बताइएको छ।
साउन १९ गते बसेको स्थायी समिति बैठकले पार्टीभित्रको गुट, उपगुट र स्वार्थ समूह विघटन गर्ने निर्णय गरेको थियो। साथै विप्लव नेतृत्वको नेकपासँग एकता गर्ने र नेकपा (एकीकृत समाजवादी)सँग एकताका लागि छलफल जारी राख्ने निर्णय पनि गरिसकेको थियो।
तर, यी निर्णयको विपरीत गतिविधि अझै जारी रहेको देखिएकाले त्यसबारे पनि बैठकमा विस्तृत छलफल हुने अपेक्षा गरिएको छ।
>
