काठमाडौं । नेपाली हास्य–नाट्यमूलक ब्लकबस्टर फिल्म ‘छक्कापञ्जा ३’ युट्युबमा सबैभन्दा धेरै पटक हेरिएको नेपाली फिल्म बनेको छ।

हाइलाइट्स नेपालको युट्युब च्यानलमार्फत चार वर्षअघि सार्वजनिक भएको यस फिल्मलाई शुक्रबारसम्म ३ करोड ७० लाख भन्दा बढी पटक हेरिएको छ। यससँगै यो फिल्मले युट्युबमा नेपाली सिनेमाको नयाँ कीर्तिमान कायम गरेको छ।

दीपाश्री निरौलाको निर्देशनमा बनेको ‘छक्कापञ्जा ३’ मा दीपकराज गिरी, दीपिका प्रसाईं, प्रियंका कार्की, केदारप्रसाद घिमिरे (माग्ने बुढा), जितु नेपाल, नीर शाह लगायतका कलाकारहरूको दमदार अभिनय छ। सामाजिक सन्देशलाई हास्य–व्यङ्ग्यसँग जोडेर प्रस्तुत गरिएको यो फिल्मले रिलिज समयमा पनि बक्स अफिसमा राम्रो सफलता पाएको थियो।

युट्युबमा सबैभन्दा धेरै हेरिने फिल्मको सूचीमा दोस्रो स्थानमा अनमोल केसी अभिनीत फिल्म ‘क्याप्टेन’ रहेको छ, जसलाई हालसम्म ३ करोड ६३ लाख पटक हेरिएको छ। तेस्रो स्थानमा प्रदीप खड्का स्टारर ‘प्रेमगीत’ छ, जसलाई ३ करोड ४४ लाख भन्दा बढी पटक हेरेर प्रशंसा गरिएको छ।

यो तथ्यांकले देखाउँछ कि, हलमा मात्र होइन, युट्युबजस्ता डिजिटल प्लेटफर्ममा पनि नेपाली फिल्महरू दर्शकबीच उत्तिकै लोकप्रिय बनेका छन्। विशेषगरी, ‘छक्कापञ्जा’ शृंखलाले नेपाली समाजका वास्तविक कथालाई मनोरञ्जनसँग मिसाउँदै दर्शकलाई बाँध्न सक्ने क्षमता देखाएको छ।