आइतबार राति अफगानिस्तानको पूर्वी क्षेत्रमा ६.० तीव्रताको भूकम्प जाँदा कम्तिमा २० जनाको मृत्यु भएको छ भने ११५ भन्दा बढी घाइते भएका छन्। नंगरहार र कुनार प्रान्तका अस्पतालमा घाइतेहरूको उपचार भइरहेको छ।
८ किमि गहिराइमा आएको भूकम्पपछि तीनवटा पराकम्पन महसुस गरिएको छ। कम्पनले राजधानी काबुल र पाकिस्तानको इस्लामाबादसम्म हल्लाएको अन्तर्राष्ट्रिय सञ्चारमाध्यमले जनाएका छन्।
दुर्गम र कमजोर संरचना भएका क्षेत्रमा उद्धार कार्य कठिन भएको तालिबान अधिकारीहरूले बताएका छन्। सडकहरू अवरुद्ध भएकाले उद्धार हवाईमार्गबाट मात्र सम्भव रहेको र अन्तर्राष्ट्रिय संस्थालाई हेलिकप्टर उपलब्ध गराउन आग्रह गरिएको छ।
अमेरिकी भूगर्भीय सर्वेक्षण (USGS) का अनुसार मृतक संख्या अझै बढ्ने सम्भावना छ। स्थानीय स्रोतहरूले दर्जनौँ घर भत्किएको र सयौँ मानिस भग्नावशेषमा पुरिन सक्ने आशंका व्यक्त गरेका छन्।
>
