पेरिसको प्रसिद्ध लिलामी संस्था सोथबी ले गत महिना इङ्लिस गायिका, अभिनेत्री र फेसन आइकन जेन बर्किन को पुरानो हर्मिस ब्याग ८६ लाख युरो — नेपाली रुपैयाँमा झन्डै १ अर्ब ३५ करोड मा बिक्री गर्यो। यो ब्याग १९८४ मा बर्किनका लागि विशेष रूपमा डिजाइन गरिएको थियो, जसमा अझै पनि उनले टाँसेका स्टिकरहरू देख्न सकिन्छ।
सुरुमा १० लाख युरोबाट लिलामी सुरु भएको थियो तर एक जापानी संकलक ले अन्ततः ८६ लाख युरो तिरेर खरिद गरे। यो लिलामीसँगै फेसन सामग्रीहरू पनि अब चित्रकलाजस्तै मूल्य राख्ने लगानी वस्तुमा रूपान्तरण भइरहेको सन्देश दिन्छ।
पहिले लिलामी घरहरू प्रायः चित्रकला, मूर्तिकला आदि कलाका वस्तुहरूमा केन्द्रित हुन्थे। तर पछिल्ला वर्षहरूमा हर्मिस, रोलेक्स, कार्टियर लगायत लक्जरी ब्रान्डका पुराना फेसन सामग्रीहरू लिलामीमा निकै महँगो मूल्यमा बिक्न थालेका छन्।
राजकुमारी डायना वा मर्लिन मोनरो जस्ता आइकनिक व्यक्तिहरूका लुगा तथा सामानहरू करोडौं मूल्यमा बिक्री भएका उदाहरण छन्। मोनरोको ‘ह्याप्पी बर्थडे मिस्टर प्रेसिडेन्ट’ नामक लुगा १९९९ मा १३ लाख डलरमा र २०१६ मा ४८ लाख डलरमा बिकेको थियो।
आजभोलि यस्तो सामान किन्नु केवल स्टाइल देखाउने माध्यम मात्रै होइन, लगानीको रणनीति पनि हो। जसरी १३ लाख डलरमा किनिएको मोनरोको लुगा ४८ लाख डलरमा बिक्यो, त्यसरी नै धेरैले फेसन सामाग्रीलाई "लक्जरी एसेट" का रूपमा हेर्न थालेका छन्।
तर यस्तो बजार सधैं स्थिर हुँदैन। लिलामी मूल्यहरूमा उतारचढाव हुन्छ। अझै पनि धेरैका लागि यस्तो खर्च "बेतुकको" लाग्न सक्छ। तर यो सबै व्यापार हो — र व्यापार नाफाका लागि हुन्छ।
जेन बर्किनको ह्यान्डब्यागको १ अर्ब ३५ करोड मूल्यले एउटा कुरा प्रष्ट देखाउँछ — फेसन अब केवल लुगा वा झोला होइन, संस्कृति, पहिचान, नाफा, र राजनीति हो। फेसनका वस्तुहरू अब इतिहास बोकेको कलात्मक सम्पदा र लगानीका स्रोत बनेका छन्।
>
